បន្ទាយមានជ័យ៖ ប្រធានគណៈកម្មការពិគ្រោះយោបល់កិច្ចការស្ត្រីនិងកុមារ (គ.ក.ស.ក) ខេត្តបន្ទាយមានជ័យ បានលើកឡើងថា ស្ត្រីនិងកុមារ ត្រូវតែទទួលបាននូវការយកចិត្តទុកដាក់ លើកកម្ពស់ពីគ្រប់ភាគីពាក់ព័ន្ធ ដើម្បីការលុបបំបាត់ការរើសអើង ការប្រើប្រាស់អំពើហិង្សា និងការរំលោភបំពានផ្សេងៗ។ ការលើកឡើងនេះគឺបន្ទាប់ពីក្រុមការងារបានរកឃើញករណីអំពើហិង្សា ៤ករណីសុទ្ធទាក់ទងនឹងអំពើហិង្សា និងការរំលោភលើស្រ្តីនិងកុមារក្នុងខេត្ត។

ប្រធានគណៈកម្មាធិការពិគ្រោះយោបល់កិច្ចការស្ត្រីនិងកុមារ (គ.ក.ស.ក) ក្នុងពេលប្រជុំសាមញ្ញប្រចាំខែមេសា ឆ្នាំ២០២២ លោកស្រី ធីវ សុខុម បានលើកឡើងថា ក្នុងរយៈពេល ៤ខែនៃឆ្នាំ២០២២ នេះអាជ្ញាធរខេត្តរកឃើញករណីហិង្សាលើកុមារចំនួន ២ករណីក្នុងនោះ ១ករណីបានបណ្ដាលឱ្យកុមារស្លាប់។ ដោយឡែក ២ករណីទៀតគឺហិង្សាដោយចេតនាដែលប្រព្រឹត្តិពីឪពុកក្មេកលើកូនប្រសារ និងករណីធ្ងន់ធ្ងរនោះគឺការរំលោភលើកុមារីពិការខួរក្បាល និងស្វិតដៃជើងអាយុ ១៤ឆ្នាំ ពីសំណាក់ជីតា និងតាជីដូនមួយ។

លោកស្រី ធីវ សុខុម ថាករណីទាំងនេះ សមត្ថកិច្ចខេត្តបន្ទាយមានជ័យបានចាប់ខ្លួនជនសង្ស័យបញ្ជូនទៅតុលាការ និងខ្លះកំពុងតាមចាប់ខ្លួន។

លោកស្រីបានចាត់ទុកការសកម្មភាពនៃការរើសអើង ការប្រើប្រាស់អំពើហិង្សា និងការរំលោភបំពានផ្សេងៗ លើស្ដ្រីនិងកុមារគឺជាសកម្មភាពដែលមិនអាចទទួលយកបាន និងបានអំពាវនាវដល់គ្រប់ភាគីពាក់ព័ន្ធ និងអង្គការដៃគូក្នុងខេត្តចូលរួមដោះស្រាយក្នុងកិច្ចការទាំងនេះផងដែរ៕